Па ініцыятыве жыхара Новай Баравой на раёне ўсталявалі кантэйнеры для макулатуры

1627
Найчасцей экалагічную ініцыятыву спускаюць зверху: здаем макулатуру ў школах, звыкаемся з закладным коштам на тару і іншае. Аднак актыўнасць у гэтай справе пачынаюць праяўляць самі людзі.

 

Малады чалавек (імя прасіў не называць) пераехаў у раён Новай Баравой вясной мінулага года. Разам з сабой ён вырашыў прывесці на новае месца добрую звычку — раздзельны збор адходаў. Так дзякуючы прадпрымальнасці хлопца, у сучасным жылым квартале з'явіліся зялёныя кантэйнеры для збора макулатуры.
 
«На былым месцы, дзе я жыў, такія кантэйнеры ўжо былі. Праз старшыню дома мне атрымалася даведацца, якім чынам і дзе іх можна замовіць. Я звязаўся з арганізацыяй «БелГіпс» і праз пару месяцаў кантэйнеры ўсталявалі на Новай Баравой», — тлумачыць ён.
 
Акрамя таго, хлопец узяўся праінфармаваць сваіх новых суседзяў пра тое, што акрамя агульнага смецця на кантэйнернай пляцоўцы ёсць спецыяльны бак, куды варта выносіць адходы на перапрацоўку. З гэтай мэтай ён павесіў інфармацыйныя таблічкі на ўсіх пляцоўках для кантэйнераў. Малады чалавек з жалем адзначае, што пра такі функцыянал раёна многія яго жыхары нават не здагадваліся.
Каб заахвоціць людзей быць больш актыўнымі ў сартыроўцы смецця, хлопец праз суседскія суполкі ў сацыяльных сетках правёў конкурс на лепшы агітацыйны плакат за раздзельны збор смецця. У якасці прыза малады чалавек разыгрываў спецыяльную кухоную сістэму для сартыравання, якая засталася ў яго з былой кватэры і ў новую не пасавала.
«У кожным пад'ездзе ёсць чорныя дошкі, на якіх можна маляваць крэйдай. Я прапанаваў людзям тэму для сценгазеты "збор смецця". Адгукнуліся, вядома не ўсе… Але праз апытанне жыльцоў мы знайшлі пераможца, які атрымаў сістэму для сартыроўкі», — удакладняе ён.
 
 
Рэакцыя суседзяў на ініцыятыўнасць хлопца розная: камусьці падабаецца, камусьці — не. Аднак ён не адчайваецца і падкрэслівае, што незадаволеныя, наколькі б усё ні было добра, будуць заўсёды.
У астатнім жа асаблівых праблем з усталяваннем тых жа кантэйнераў у маладога чалавека не ўзнікла. Нават тыя бюракратычныя моманты, што і былі, вырашальныя.
«У нас быў старшыня — не бі ляжачага, — прыгадвае ён. — Яму гэта было ўсё нецікава пакуль ён не даведаўся, што "БелГіпс" займаецца вывазам бясплатна. Акрамя таго, праз раздзельны збор макулатуры змяншаецца колькасць агульнага смецця, а значыць і перыядычнасць яго вываза — рэальная эканомія. Менавіта гэта яго і падкупіла».
 
Чаму ж кантэйнеры не з'явіліся на Новай Баравой раней, цяжка сказаць. Як высветлілася, «БелГіпс» звяртаўся да кампаніі «А-100» з прапановай. Але як тлумачыць хлопец, А-100 ужо не мае ніякага дачынення да іх дамоў, бо яны перададзены на баланс таварыстваў і такія пытанні зараз вырашаюцца імі.
 
І верагодна, што кантэйнеры яшчэ могуць знікнуць з мікрараёна, іранічна заўважае малады чалавек, бо яны не зусім упісваюцца ў дызайн Новай Баравой. 
 
 
Што ж тычыцца ў цэлым экалагічнай ініцыятыўнасці хлопца, то, як ён сам адзначае, нічога дзіўнага ў гэтым няма:
 
«Развітыя краіны ўжо даўно сартыруюць смецце. Другасныя матэрыяльныя рэсурсы прыносяць ім не толькі эканамічныя выгоды, але і бытавыя, калі праз перапрацоўку вымаецца рэсурс на тое ж ацяпленне памяшканняў.
 
А ў нас жа, выйдзі ў лес ці на возера — усё засмечана, што страшна знаходзіцца на прыродзе. Вядома, жывучы ў горадзе, ты ўсяго гэтага не бачыш. Але, напрыклад, вакол сталіцы існуюць 3 буйныя палігоны, на якія вывозіцца ўсё наша смецце. Яны дакладна не ўпрыгожваюць ваколіцы Мінска, ды й экалогію не паляпшаюць. Таму калі ёсць адладжаная сістэма, то чаму б ёй не карыстацца?»
 
Хрысціна Чарняўская
Фота аўтара
Блізкія Навіны
 







Дорогие читатели и случайные посетители blizko.by!

В связи с новым постановлением Совмина «Положение о порядке предварительной идентификации пользователей интернет-ресурса, сетевого издания» мы временно отключили возможность комментирования. Нам понадобится некоторое время, чтобы сделать общение на нашем сайте максимально комфортным для вас.

Не беспокойтесь, очень скоро все будет готово!
Другие новости Уручья




Каталог Уручья


Уручье